लिलाकान्त यादव,
काठमांडौ, १६ चैत्र ।
जनता समाजवादी पार्टी (जसपा) नेपालले काठमाडौँमा भएको हिंसात्मक घटनाको कडा निन्दा गर्दै दोषीउपर कानूनी कारबाही गर्न उच्चस्तरीय न्यायिक छानबिन आयोग गठन गर्न माग गरेको छ। पार्टीले संघीय लोकतान्त्रिक गणतन्त्रात्मक प्रणालीमाथि आक्रमण गर्ने उद्देश्यले हिंसात्मक प्रदर्शन, तोडफोड, आगजनी, लुटपाट, र निर्दोष व्यक्तिको हत्या गरिएको बताएको छ।
जसपाले नेपाल सरकार शान्ति–सुरक्षा कायम गर्न असफल भएको आरोप लगाउँदै संघीय लोकतान्त्रिक गणतन्त्र, धर्मनिरपेक्षता, नागरिक स्वतन्त्रता, मौलिक हक, र समावेशी व्यवस्थाको रक्षा गर्न सरकार गम्भीर बन्नुपर्ने बताएको छ।
पार्टीले हिंसात्मक घटनामा संलग्न दोषीलाई कडा कानूनी कारबाही गर्न, मृतकप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्य लाभको कामना गरेको छ। साथै, सरकारलाई भ्रष्टाचार, अराजकता, लुटतन्त्र, र दण्डहीनता अन्त्य गर्दै मुलुकमा सुशासन, सामाजिक न्याय, विकास, र समृद्धिका लागि ठोस कदम चाल्न आग्रह गरेको छ।